counter hit xanga
October 18, 2021

පාස්කු ප්‍රහාරකයන්ට එරෙහිව කඩිනමින් නඩු දානවා!

Sanjay Rajaratnam MR lankaecast

Last Updated on May 31, 2021 by Panduka Herath

මෙරට 48 වැනි නීතිපති ලෙස වැඩ භාරගත් ජනාධිපති නීතීඥ සංජය රාජරත්නම් මහතා අද (31) දින අරලියගහ මන්දිරයේ දී අග්‍රාමාත්‍ය මහින්ද රාජපක්ෂ මහතා හමුවනා. නීතිපති ධුරයේ වැඩ භාර ගත් බව සැල කිරීමට පැමිණි ජනාධිපති නීතිඥ සංජය රාජරත්නම් මහතාට අග්‍රාමාත්‍ය මහින්ද රාජපක්ෂ මහතා මෙහි දී සුබ පැතුම් එක් කළේය.

කොළඹ වරායට නුදුරු මුහුදේ ගිනි ගැනීමට ලක් වූ MV X-Press Pearl  නෞකාව සම්බන්ධයෙන් හා එමගින් සමුද්‍රීය පරිසරයට සිදුවී ඇති හානිය සම්බන්ධයෙන් ගන්නා ඉදිරි නීතිමය ක්‍රියාමාර්ග පිළිබඳව අග්‍රාමාත්‍යවරයා මෙහිදී අවධානය යොමු කළේය.

නෞකාව සම්බන්ධයෙන් අදාළ නීතිමය පියවර කඩිනමින් ඉටුවනු ඇති බව කී නව නීතිපතිවරයා, පාස්කු ඉරිදා දින ත්‍රස්ත ප්‍රහාරයේ චූදිතයන් සම්බන්ධයෙන් කෙරෙන විමර්ශන කෙරෙහි ද විශේෂ අවධානයක් යොමුකර එම චූදිතයන්ට එරෙහිව කඩිනමින් නඩු පැවරීමට පියවර ගන්නා බවද කියා සිටියේ ය.

මෙහි දී නීතිපති දෙපාර්තමේන්තුවට අලුතින් ගොඩනැඟිල්ලක් ලබාදීම ගැන අග්‍රාමාත්‍යවරයාට සිය ස්තූතිය පළකළ නීතිපතිතුමා, අතීතයේ සිට නීතිපති දෙපාර්තමේන්තුව පිහිටා ඇති ගොඩනැගිල්ල ඉතා පැරණි හා පෞරාණික වටිනාකමකින් යුත් ගොඩනැගිල්ලක් වන බැවින් එහි අත්‍යවශ්‍ය ප්‍රතිසංස්කරණ කටයුතු සඳහා රජයේ සහය ලබා දෙන්නැයි අගමැතිගෙන් ඉල්ලා සිටියේය.

මිනීමැරුම් නඩු සම්බන්ධයෙන් කෙරෙන ලඝු නොවන නඩු කටයුතු මහේස්ත්‍රාත් අධිකරණයේ විමසීමට ගැනීමේ දී ඒ සම්බන්ධව මෙයට පෙර නීතිපති දෙපාර්තමේන්තුවේ රජයේ නීතිඥවරුන්ගේ සහය ලබා ගැනීමේ ක්‍රමවේදය ක්‍රියාත්මක වුවත් දැනට එසේ නොවීම නිසා ඇතිව තිබෙන ගැටලු පෙන්වා දී ඒ සම්බන්ධව අධිකරණ අමාත්‍යාංශය හා සාකච්ඡා කොට අවශ්‍ය පියවර ගන්නැයි නීතිපතිවරයාට අග්‍රාමාත්‍යවරයා උපදෙස් දුන්නේය.

මෙම අවස්ථාවට අග්‍රාමාත්‍ය ලේකම් ගාමිණී සෙනරත්, අග්‍රාමාත්‍ය කාර්ය මණ්ඩල ප්‍රධානී යෝෂිත රාජපක්ෂ , නීතිපති දෙපාර්තමේන්තුවේ ජේෂ්ඨ නියෝජ්‍ය සොලිසිටර් ජනරාල් චේතිය ගුණසේකර‍ සහ අග්‍රාමාත්‍ය අතිරේක ලේකම්වරුන්වන චමින්ද කුලරත්න, ගනේශ් ධර්මවර්ධන මහත්වරු එක්ව සිටියහ.

PMO6983
PMO7017
PMO7011
PMO6998