දේශපාලන විසදුම වෙනුවෙන් වහාම ජනමත විචාරණයක් ඉල්ලයි!

Last Updated on November 8, 2022 by Desman Chathuranga

යුද්ධය නිමා වී වසර 13ක් ගෙවි ගියද රජයේ ආරක්ෂක අංශ වාඩිලා සිටින උතුරු නැගෙනහිර දෙපළාතේ දෙමළ ජනයාගේ පෞද්ගලික ඉඩම් අක්කර දහස් ගණනක් වහාම නිදහස් කරන ලෙස බල කරමින් යාපනයේදී විරෝධතාවයක් පැවැත්වුනා.

යාපනය විශ්වවිද්‍යාල ශිෂ්‍ය සංගමයේ සංවිධානත්වයෙන් ඉඩම් හිමියන්, සිවිල් සංවිධාන ක්‍රියාකාරීන් හා ආගමික නායකයන් ද ඇතුළු සිය ගණනකගේ සහභාගීත්වයෙන් නොවැම්බර් 2 වැනි බදාදා තෙල්ලිපලෙයි හන්දියෙන් ආරම්භ කළ විරෝධතා පා ගමන අවසන් කර තිබුනේ වලිකාමම් උතුර ප්‍රදේශිය ලේකම් කාර්යාලය දක්වා පැමිණ සිය ඉල්ලීම් ඇතුලත් සන්දේශයක් භාර දෙමිනි.

රජයේ ආරක්ෂක අංශ බලහත්කාරයෙන් අල්ලාගෙන සිටින දෙමළ ජනයාට අයත් උතුරු නැගෙනහිර දෙපළාතේ සියලුම පෞද්ගලික ඉඩම් වහාම නිදහස් කරන ලෙස ඉල්ලා සිටින එම සංදේශය මගින් වැඩි දුරටත් ඉල්ලා ඇත්තේ එම දෙපළාතේ කදවුරු බැද සිටින යුද හමුදාවන් වහාම එම භුමියෙන් ඉවත් කරන ලෙසයි.

දෙමළ ජනයාට අවශ්‍ය ස්තීර දේශපාලන විසදුම කුමක්දැයි දැනගැනීම සදහා ජනමත විචාරණයක් පවත්වන ලෙසද එම සන්දේශය මගින් ඉල්ලා තිබේ.

ප්‍රදේශවාසීන් පවසන පරිදි යුද සමයේදී වලිකාමම් උතුර ප්‍රදේශයේ පමණක් යුද හමුදාව විසින් අත්පත්කරගෙන ඇති දෙමළ ජනයාට අයත් පෞද්ගලික ඉඩම් ප්‍රමාණය අක්කර 6384 කි.

යුද්ධය නිමා වීමෙන් පසුව ඉඩම් හිමියන් විසින් සිදු කරන ලද විරෝධතා හමුවේ ඉඩම් අක්කර 3384 ක් නිදහස් කර ගැනීමට හැකිවු බවයි ඔහුන් පෙන්වා දෙන්නේ.

නිදහස් නොකළ ඉතිරි ඉඩම් අක්කර 3000 න් ඉඩම් අක්කර 1600 ක් හමුදා කදවුර පුළුල් කිරීම සදහා වෙන් කරන ලෙස පසුගිය සැප්තැම්බර් මාසයේදී ඉඩම් අමාත්‍යවරයා විසින් ප්‍රාදේශිය ලේකම්වරයාට ලිපියක්ද යොමු කර තිබෙන බවද ප්‍රදේශවාසීන් අනාවරණය කර සිටි.

කෙසේවෙතත් ශ්‍රි ලංකා ආණ්ඩුව එක්සත් ජාතීන්ගේ සංවිධානයට දන්වා ඇත්තේ හමුදාව අත්පත්කරගෙන ඇති ඉඩම් ප්‍රමාණය අක්කර 53ක් පමණක් බවයි.